Stefna um skipulag haf- og strandsvæða
Stefna um skipulag haf- og strandsvæða er sett fram í landsskipulagsstefnu.
Þingsályktun um Landsskipulagsstefnu 2015–2026 var samþykkt á Alþingi árið 2016. Þar er sett fram stefna um skipulagsmál á landsvísu til leiðbeiningar fyrir skipulagsgerð sveitarfélaga, skipulagsgerð og nýtingu á haf- og strandsvæðum og aðra áætlanagerð um landnotkun og byggðaþróun.
Kynningarmyndband um stefnu um skipulag haf- og strandsvæða í Landsskipulagsstefnu 2015-2026.
Í Landsskipulagsstefnu 2015–2026 eru sett fram leiðarljós sem leggja skal til grundvallar allri skipulagsgerð, þ.m.t. á haf- og strandsvæðum. Þau eru:
- Að skipulag stuðli að sjálfbærri þróun
- Að skipulag sé sveigjanlegt og stuðli að seiglu gagnvart samfélags og umhverfisbreytingum
- Að skipulag stuðli að lífsgæðum fólks
- Að skipulag styðji samkeppnishæfni landsins alls og einstakra landshluta
Í landsskipulagsstefnu er sett fram eftirfarandi stefna um skipulag haf- og strandsvæða:
SKIPULAG Á HAF- OG STRANDSVÆÐUM
Skipulag haf- og strandsvæða veiti grundvöll fyrir fjölbreyttri nýtingu um leið og viðhaldið verði mikilvægum auðlindum hafsvæða við Ísland.
Sjálfbær nýting auðlinda
Skipulag nýtingar á haf- og strandsvæðum grundvallist á heildarsýn á málefni hafsins þar sem viðhaldið verði heilbrigði, líffræðilegri fjölbreytni og framleiðslugetu hafsins. Skipulagsákvarðanir um staðbundna nýtingu á haf- og strandsvæðum byggist á vistkerfisnálgun og stuðli þannig að viðhaldi vistkerfa og sjálfbærri nýtingu auðlinda.
Skýr og skilvirk stjórnsýsla skipulagsmála
Stjórnsýsla skipulagsmála á haf- og strandsvæðum verði skýr og samræmd. Aðkoma ólíkra stjórnvalda og hagsmunaaðila að skipulagsvinnunni verði tryggð og leitast við að koma í veg fyrir árekstra ólíkrar nýtingar og verndarsjónarmiða.
Svæðisbundin skipulagsgerð
Komið verði á fót
svæðisbundinni skipulagsgerð fyrir haf- og strandsvæði næst landi sem veiti
grundvöll fyrir nýtingu haf- og strandsvæða, taki mið af mismunandi hagsmunum
og samþættingu nýtingar og verndar við ströndina, þar sem gæta þarf samræmis
milli skipulags á landi og hafi.
Nánari upplýsingar um landsskipulagsstefnu má nálgast á landsskipulag.is